這本冊想beh kā阮這十幾冬以來，有關台語文語料處理ê做法、成果kah一寡經驗，做khah詳細完整ê整理kah討論，同時mā介紹現有ê台語文線頂資源，一方面kā這段時間真濟友志做陣拍拚ê成果做記錄，另外一方面，mā向望透過chia ê介紹，鼓勵少年輩ê朋友加入這个少人行無人疼m̄-koh真有意義ê領域。
筆者是台北人，雖然自細漢講台語，總是讀國民小學了後，大環境ê關係，台語就漸漸拍無去，一直到讀大學，受著政治方面ê啟蒙，雄雄發現hŏng騙真久，開始關心台灣了後，才koh kā台語勻勻仔khioh轉來，1987年接觸著台語文，深深感覺台語ê傳承，文字是足要緊ê家私，chŏaⁿ規身撩落來，kā台語文成做一生ê志業。
因為台語文，ùi羅馬字（白話字）切入，才發覺台語文早就已經有濟甲若山ê文獻chhāi tī hia，了後koh發現，日本時代mā留足豐沛ê台語文本落來，濟甲讀袂完，雖然chia ê資料攏khah真oh-tit看著。
筆者是讀電腦ê，tī台大資訊系讀書ê時，本成讀甲小可無意無意，m̄知是m̄是beh繼續行落去，四年ê時，中央研究院資訊所陳克健老師來阮系開「自然語言處理」這門選修課，拍開我心內一扇窗，原來資訊ê專業會使運用tī語言處理方面。當其時讀ê教科書是teh討論英文beh按怎處理，華文彼陣才beh起步niǎ。
因為這个因緣，退伍了後我就去中研院資訊所詞庫小組食頭路，tè陳老師學工夫，陳老師成做後來我碩士kah博士ê共同指導老師。這期間考著清華資訊所去hia讀碩士，mā繼續tī詞庫小組做兼任助理。彼陣開發中文ê語詞檢索系統，中文語料ê內碼ùi電信碼、shift BIG-5 beh轉過去BIG-5，轉袂過ê漢字就用“”來表示，若去看hia ê語料，會看著滿天星，實務ê經驗予我深深感覺，資料若清氣，人生是彩色ê（至少khah好食睏），資料品質若bái，寫程式以外愛koh做真濟dirty work。
除了語詞檢索，koh有開發文稿校對系統，因為古文beh用人工校對實在真艱苦mā無效率，khah省錢ê方法是請兩間拍字行拍仝一份文本，了後用電腦系統揣出兩个電子檔案無仝ê所在，人工看這部分就好。碩士論文做文件自動分類，tī無用辭典ê情形，ùi文章內底揣出會當做分類標準ê關鍵詞，用chia ê關鍵詞來做文件分類，彼陣WWW才當起步，Google iah未出世。
Kā時間se̍h翻頭，做兵退伍轉台灣ê時，有接觸鄭良偉教授kah 伊開發ê TW301台語輸入法，對有電腦背景ê筆者來講，beh了解這个台語輸入法ê運作並無困難，會當家己修正、增補詞庫內容。讀碩士班ê時，真濟間學校已經有台語文相關社團，逐家做陣tī 1992年成立學生台灣語文促進會，我做第一任會長，會長有一个重要ê工課，就是發落《台語學生》這份機關刊物ê發行，《台語學生》一個月出三期，各校社團輪流編，負責ê社團愛家己寫稿、拍字，我這爿才彙[lūi]整，TW301輸入法（包括我增補ê詞庫）對刊物ê發行有真大ê幫贊，彼時陣ê台語文刊物，親像《台文通訊》等等，mā受著TW301大幫贊。
1999年筆者去大漢技術學院教書，思考家己ê研究方向，才開始考慮台語文kah電腦結合ê可能性，總是心內小可驚驚，一方面，進前並無人開創這个領域，是m̄是會當行出一條路，一屑仔把握都無，另外一方面mā無啥物基礎資源thang好運用，彼陣iah無線頂台語辭典，無充足ê語料。會記得有一擺請公假去世界台文營報告台語相關ê電腦工具，轉來beh報出差，會計室kā出差單退轉來，kā你寫講「與專業不符」。一直到2004年決定beh讀博士班，想beh做台語計算語言學方面ê研究，有幾个老師好心kā我提醒，做這可能無法度畢業。
有資源當然就kā sa來用，無資源就家己想法度kā生出來，進前tī詞庫小組練工夫，這馬會當發揮ah，啥物是台語無、華語有ê物件，kā做看覓就著ah，橫直有樣看樣無想家己想。總是台語文ê書寫加誠無一致，這表示愛做比中文koh-khah濟ê dirty work。Ùi 2000年利用鄭良偉教授提供ê詞條開發台華線頂辭典，了後kā家己ê庫存語料加上請台文刊物編輯提供，以chia ê語料做基礎，2003年開發台語文語詞檢索系統，紲落來koh kā書架仔頂頭古早ê台語書提去影印店scan轉做圖檔，2007年開發台語文記憶系統，想著啥物有需要就kā舞看覓。除了家己想beh做ê，koh有一寡是因為計畫ê壓力，硬kā chiⁿ出來ê，親像台文館ê台語發音系統kah台語文數位典藏資料庫，抑是教育部台語字詞頻統計等等，陸陸續續做出十幾个線頂系統，當然，大部分是團隊合作ê成果，m̄是家己一个人ê功勞。
會記得彼陣beh做進前，攏會先kā問題想予khah徹底leh，抑是先寫一个小程式試一下仔鹹汫，時機若成熟，揀一个無排課ê下晡，研究室門關起來mài予學生來枵飽吵，就撩落去緊寫程式，因為有家庭、有頭路，無才調無食無睏一直kā做落去，愛分幾lō遍；門關幾lō擺了後總算kā系統ê初胚完成，就先kā掛上網，koh換去使用者ê角度來想，看按怎改進會khah好勢，有ê idea想一、兩個月，有ê甚至考慮一、兩冬，有明確ê想法抑是揣著khah好ê解決方案了後，才chhiâu一个適當ê時間撩落去改。
會當將家己ê專長（電腦）kah興趣（台語文）結合做伙，後來行出一條路，過程雖然誠辛苦，總是心情是歡喜ê。不管按怎，ùi無啥會曉講台語到kā台語文工課當做一生ê志業，ùi大學開始不時想beh改途到一直讀起li（這馬tī台語系教書，mā算是改途ah），ùi可能袂畢業到終其尾提著博士學位（代價是身體規組害了了，ùi頭殼到跤底攏有koh-iūⁿ），人生確實是oh得按算。
人生oh得按算ê代誌m̄-nā這幾項，我tī 30歲ê時陣有做一擺大冒險，放棄台北穩定ê頭路走去花蓮度日子，頭前三年換五个頭路，換去第五个頭路，大漢技術學院做老師彼年（1999），校長kā阮講，舊年（1998）規年台灣ê出生人口比大專校院ê招生人數koh-khah少，所以18冬後會有危機，彼時學生濟，上課上甲歪腰，一點仔mā感覺袂出來，總是過無幾冬，學生數就開始直直落，敢ná teh趨流籠。有一擺參加研討會，洪惟仁老師kā我講：你tī大漢[Tāi-hàn]袂大漢[tōa-hàn]！
去花蓮生活是為著beh過逐工看山看海ê日子，m̄-koh beh大漢，必須愛有改變。後來到台中教育大學台灣語文學系教書（tī chia上課攏用台語，有夠好ê好），koh後來，離開蹛16冬蹛甲四序四序ê花蓮，規家伙仔搬來台中，雖然心內iah-koh定定teh數想，拍開窗仔門就會當看著青leng-leng ê太平洋。
決定beh寫作了後，這段期間搬兩擺厝，加減影響著寫作ê進度，總是mā kā交出來ah。
Tī這本冊，kā阮所知ê，最近10外冬來台語文語料處理方面相關ê進展kah成果，做初步ê整理kah記錄，希望chia ê成果，會當成做以後相關研究ê基礎，mā希望透過相關線頂系統ê介紹，逐家thang好好仔來運用chia ê工具，加速台語文ê推展。總是個人見識有限，難免有落勾ê所在。
另外，mā特別感謝秀蓮kah理揚幫贊校對、編輯、...等等出版進前li-li-khok-khok ê工課，予這本書會當順利出版。
歐美一寡大學有計算語言學ê相關系所，中國ê北京大學有計算語言學研究所，比較起來，台灣ê學界，對計算語言學這門學科是相對khah無重視ê，華語是按呢，台語就koh-khah m̄免講。（台灣ê語言學界另外一个問題是，普遍khah無注重本土語言。）
可能是因為台語文處理相對khah冷門，mā可能同時有電腦技術koh對台語文有興趣ê人並無濟，加上伊tī資源分配方面本成就足弱勢。一路行過來ê感覺是，這條路不止孤單、辛苦，進展mā算無緊。
對台語文ê發展，到底應該愛樂觀抑是悲觀，逐家可能有無仝ê看法。一方面，台語tī家庭ê使用ná像愈來愈少，少年家對台語愈來愈無感情；另外一方面，透過國校一禮拜一節ê本土語言課，koh看著台語生湠ê一寡成果，甚至部分已經放棄使用母語ê家庭，因為囡仔學習ê需要，koh kā母語khioh轉來用，有淡薄仔恢復ê趨勢出來。
大環境予咱警覺著台語可能會綴時間漸漸仔衰微去，因為當阿公、阿媽彼沿勻勻仔凋零，爸母彼沿因為讀書ê時hǒng禁止講家己ê母語，造成母語能力降低，囡仔會當接觸母語ê機會減少，會自然失去對母語ê感情。M̄-koh換另外一个角度來看，網路這个媒介，有伊深遠ê影響力，koh予咱感覺會使透過這个工具，對母語來做khah好ê保存kah推展。
資訊技術ê變動誠緊，以目前ê情形來看，包括智慧型手機ê應用程式，抑是電子冊ê部分，攏是台語文值得發展ê所在，真久以來koh有一个想法，台語文若beh興，愛結合線頂遊戲，chia ê攏是未來值得好好仔開拓ê部分。
希望透過這本冊所整理ê、濟濟對台語文處理付出kah拍拚ê成果，會當吸引koh-khah濟人行入挽救、推廣台語ê路。咱確實無悲觀ê權利，只有繼續一路行向前。
而且拍死無退！
