鯉魚潭、七星潭兩潭自行車道踏查記錄10-花蓮漁港到四八高地
食飽了後繼續騎，往奇萊鼻這段海岸，景緻袂bái。
Chia̍h pá liáu-āu kè-sio̍k khiâ, óng Kî-lâi-phīⁿ chit tōaⁿ hái-hōaⁿ, kéng-tì bōe bái.
亭仔。
Têng-á.
這段路攏總有兩個亭仔。
Chit tōaⁿ lō͘ lóng-chóng ū nn̄g ê têng-á.
亭仔。騎tī這段路，有機會看著較特別ê鳥仔，特別ê意思是，我叫袂出名。
Têng-á. Khiâ tī chit tōaⁿ lō͘, ū ki-hōe khòaⁿ-tio̍h khah te̍k-pia̍t ê chiáu-á, te̍k-pia̍t ê ì-sù sī, góa kiò bōe chhut miâ.
6 khí-lò͘是ùi曙光橋算起ê。頭前是奇萊鼻，有燈塔，這馬是花蓮市糞埽場，經過遐ê時，上好騎較緊leh，因為足臭ê。
La̍k khí-lò͘ sī ùi Sú-kng-kiô sǹg khí --ê. Thâu-chêng sī Kî-lâi-phīⁿ, ū teng-thah, chit-má sī Hoa-liân-chhī pùn-sò-tiûⁿ, keng-kè hiâ ê sî, siōng hó khiâ khah kín leh, in-ūi chiok chhàu --ê.
糞埽場邊a ê樹仔，因為寒天，所以無葉仔。這叫做風剪樹，看著這欉樹仔，就大約仔會當知影方向，因為東北季風ê關係，風剪樹ê樹椏向西南方向生長。
Pùn-sò-tiûⁿ piⁿ--a ê chhiū-á, in-ūi kôaⁿ-thiⁿ, só͘-í bô hio̍h-á. Che kiò-chòe hong-chián-chhiū, khòaⁿ-tio̍h chit châng chhiū-á, tō tāi-iok-á ē-tàng chai-iáⁿ hong-hiòng, in-ūi tang-pak kùi-hong ê koan-hē, hong-chián-chhiū ê chhiū-oe ǹg sai-lâm hong-hiòng seng-tióng.
水牛食草。
Súi-gû chia̍h chháu.
後來接出來193縣道騎一小段，koh插入去小路。邊a是軍方ê靶場。
Āu--lâi chiap chhut-lâi 193 kōan-tō khiâ chi̍t sió tōaⁿ, koh chhah ji̍p-khì sió-lō͘. Piⁿ--a sī kun-hong ê pé-tiûⁿ.
Ùi曙光橋算起ê 8 khí-lò͘。
Ùi Sú-kng-kiô sǹg khí ê poeh khí-lò͘.
路邊ê水錦花。
Lō͘-piⁿ ê chúi-gím-hoe.
這個所在，有時仔風真透。
Chit ê só͘-chāi, ū-sî-á hong chin thàu.
留言列表
