鯉魚潭、七星潭兩潭自行車道踏查記錄09-花蓮港口親水區到花蓮漁港
自轉車道到遮，愛倒斡落去打馬膠路，了後向前一屑仔囝，正斡起去棧枋路，了後落崎，接到打馬膠路進前愛落來牽車，koh隨愛注意正爿後壁港區出來ê tho͘-lá-khù。天才ê設計！我行替換道路，正斡經過景觀橋入去碼頭chiah-koh接出來。
Chū-chóan-chhia-tō kàu chiâ, ài tò-oat lo̍h-khì táⁿ-má-ka-lō͘, liáu-āu ǹg chêng chi̍t-sut-á kiáⁿ, chiàⁿ-oat khí-khì chàn-pang-lō͘, liáu-āu lo̍h-kiā, chiap kàu táⁿ-má-ka-lō͘ chìn-chêng ài lo̍h-lâi khan-chhia, koh sûi ài chù-ì chiàⁿ-pêng āu-piah káng-khu --chhut-lâi ê tho͘-lá-khù. Thian-châi ê siat-kè! Góa kiâⁿ thòe-ōaⁿ tō-lō͘, chiàⁿ-oat keng-kè kéng-koan-kiô ji̍p-khì bé-thâu chiah-koh chiap chhut-lâi.
橋邊ê案內圖。
Kiô-piⁿ ê àn-nāi-tô͘.
景觀橋，暗時看koh-khah súi。
Kéng-koan-kiô, àm-sî khòaⁿ koh-khah súi.
遮真好光景，有時仔會chhōa囡仔散步來遮。
Chia chin hó kong-kéng, ū-sî-á ē chhōa gín-á sàn-pō͘ lâi chiâ.
向碼頭ê方向看。孔明車邊a，橋ê扞手有一個孔，囡仔來遮，會一個徛tiàm遮，一個走去下跤另外一個孔ê所在，利用這個孔傳聲音，koh聽kah不止仔清楚。
Ǹg bé-thâu ê hong-hiòng khòaⁿ. Khóng-bêng-chhia piⁿ--a, kiô ê hōaⁿ-chhiú ū chi̍t ê khang, gín-á lâi chiâ, ē chi̍t ê khiā tiàm chiâ, chi̍t ê cháu khì ē-kha lēng-gōa chi̍t ê khang ê só͘-chāi, lī-iōng chit ê khang thôan siaⁿ-im, koh thiaⁿ kah put-chī-á chheng-chhó.
翻頭看景觀橋。
Hoan-thâu khòaⁿ kéng-koan-kiô.
騎落去了後翻頭看。
Khiâ --lo̍h-khì liáu-āu hoan-thâu khòaⁿ.
碼頭，對面是休閒漁港碼頭。
Bé-thâu, tùi-bīn sī hiu-hân hî-káng bé-thâu.
接轉來原來的自轉車道。遮較倚美崙工業區，tho͘-lá-khù足濟，空氣較bái。頭前是台泥。
Chiap tńg-lâi gôan-lâi ê chū-chóan-chhia-tō. Chiâ khah óa Bí-lūn kang-gia̍p-khu, tho͘-lá-khù chiok chōe, khong-khì khah bái. Thâu-chêng sī Tâi-nî.
本成希望中晝會當騎完，無疑悟沿路翕相延著時間，這陣已經下晡一點半，腹肚枵a，踅入去漁港食炒麵佮魚丸湯。
Pún-chiâⁿ hi-bōng tiong-tàu ē-tàng khiâ ôan, bô gî-gō͘ iân-lō͘ hip-siōng chhiân-tio̍h sî-kan, chit-chūn í-keng ê-po͘ chi̍t-tiám pòaⁿ, pak-tó͘ iau--a, se̍h ji̍p-khì hî-káng chia̍h chhá-mī kah hî-ôan-thng.
留言列表
