鯉魚潭、七星潭兩潭自行車道踏查記錄05-道班休息站到花蓮溪出海口
照路線圖看起來，道班休息站那像m̄是tī自轉車道內底。事實上，我出來較大ê路了後，知影方向應該是倒斡，煞一時chhē無自轉車道，料做我家己判斷錯誤，koh翻頭騎另外一向看覓，mā是chhē無路，只好照家己ê判斷，騎轉去原來認為正確ê方向，好佳哉無外久就接著自轉車道。
Chiàu lō͘-sòaⁿ-tô͘ khòaⁿ--khí-lâi, Tō-pan hiu-sek-chām ná-chhiūⁿ m̄ sī tī chū-chóan-chhia-tō lāi-tóe. Sū-si̍t siōng, góa chhut-lâi khah tōa ê lō͘ liáu-āu, chai-iáⁿ hong-hiòng èng-kai sī tò-oat, soah chi̍t-sî chhē bô chū-chóan-chhia-tō, liāu-chòe góa ka-kī phòaⁿ-tòan chhò-gō͘, koh hoan-thâu khiâ lēng-gōa chi̍t hiòng khòaⁿ-māi, mā-sī chhē bô lō͘, chí-hó chiàu ka-kī ê phòaⁿ-tòan, khiâ tńg-khì gôan-lâi jīn-ûi chèng-khak ê hong-hiòng, hó-ka-chài bô gōa kú tō chiap-tio̍h chū-chóan-chhia-tō.
十五khí-lò͘ ê牌仔。
Cha̍p-gō͘ khí-lò͘ ê pâi-á.
遮會變做大條路，是因為光華工業區ê關係。
Chiâ ē pìⁿ-chòe tōa tiâu lō͘, sī in-ūi Kong-hôa kang-gia̍p-khu ê koan-hē.
十六khí-lò͘ ê牌仔。這段ê自轉車道真濟轉彎。
Cha̍p-la̍k khí-lò͘ ê pâi-á. Chit tōaⁿ ê chū-chóan-chhia-tō chin chōe tńg-oan.
青紅燈，193縣道。
Chhiⁿ-âng-teng, 193 kōan-tō.
路口ê正爿後壁，是光華工業區ê管理處。
Lō͘-kháu ê chiàⁿ-pêng āu-piah, sī Kong-hôa kang-gia̍p-khu ê kóan-lí-chhù.
過青紅燈了後ê景緻，倒爿是大圳溝，路直直過去就是海邊。
Kè chhiⁿ-âng-teng liáu-āu ê kéng-tì, tò-pêng sī tōa chùn-kau, lō͘ ti̍t-ti̍t kè--khì tō sī hái-piⁿ.
十七khí-lò͘ ê牌仔。大海就tī頭前。
Cha̍p-chhit khí-lò͘ ê pâi-á. Tōa-hái tō tī thâu-chêng.
海邊，遮是花蓮溪出海口ê北岸。平常時定定有人tī遮釣魚。
Hái-piⁿ, chiâ sī Hoa-liân-khoe chhut-hái-kháu ê pak hōaⁿ. Pêng-siông-sî tiāⁿ-tiāⁿ ū lâng tī chiâ tiò hî.
路盡磅了後倒斡向北。
Lō͘ chīn-pōng liáu-āu tò-oat ǹg pak.
參考地圖，實際上B到C是直行，無khau過去台十一線，m̄-koh Google地圖頂面無路，所以無法度按呢畫。
Chham-khó tōe-tô͘, si̍t-chè siōng B kàu C sī ti̍t-kiâⁿ, bô khau kè-khì Tâi-cha̍p-it-sòaⁿ, m̄-koh Google tōe-tô͘ téng-bīn bô lō͘, só͘-í bô hoat-tō͘ an-ne ōe.
留言列表
