台語心世界 Tâi-gú Sim Sè-kài

台語演講稿 讀冊的好滋味

賴淑玲寫ê，我有修改一半左右

有人講：「讀冊、讀冊，愈讀愈chheh。」若我咧！是「讀冊、讀冊，愈讀愈濟，愈讀愈爽勢(sáng-sè)。」

各位評審，各位來賓，逐(ta̍k)家好，我是第五號，今仔日我欲演講的題目是「讀冊的好滋味」。

我感覺讀冊的滋味，著親像塊(teh)食鹹酸甜共款，酸甘甜a酸甘甜！精神無好的時 食--一粒(輕聲)，馬上就心涼脾肚(phî-tó͘)開，鬱卒的時 食--一粒，甘甘甜甜(kam-kam tiⁿ-tiⁿ)好滋味，無聊的時 食--一粒，愈食是愈紲喙(soà-chhùi)。

是按怎我會講讀冊親像塊(teh)食鹹酸甜leh，因為鹹酸甜有分幾lō種，會當揀選無共款的口味。像細漢的時，我上愛看恐龍(khiong-liong)的尪仔冊(ang-a-chheh)，有的恐龍大kah幾lō層(chàn)樓遐爾(hiah-nī)懸(koân)，mā有kan-na親像雞仔遐爾(hiah-nī)仔細隻的，有食肉的 mā有食草仔的，予我感覺這個世界實在是足豐富mā足趣味。另外，細漢時陣(sî-chūn)因為字較毋捌(m̄-pat)我，所以我mā真愛聽有聲(iú-siaⁿ)冊，阿爸捌(pat)買一塊介紹台灣三十幾種田蛤仔叫聲的CD，我逐(ta̍k)暗聽，後來去到野外，若聽著蛤仔聲，就會當叫出這款蛤仔的名，害我予逐(ta̍k)家呵咾(o-ló)甲會 觸舌 (tak-chi̍h)。

較大漢了後，煞變做愈愛讀冊。阮兜(tau)有一面壁是冊櫥仔，正(chiann)面排滿滿，全全攏(lóng)是冊，毋閣(m̄-koh)烏矸仔貯(toé)豆油─看袂(boē)出來，這是有鬥機關的冊櫥仔，若共(kā)伊thoah(拉)出來，內底又閣(iū-koh)冊了了。其中一位是我的管區，有歸phō的世界動物圖鑑(tô͘-kàm)、台灣自然生態繪(oē)本等等。

我mā開始愛讀冒險(mō͘-hiám)抑(iah)是玄(hiân)奇的故事，親像「海底兩萬里」塊(teh)描寫主角坐踮沕船(tiàm-bī-chûn)去海底探險(thàm-hiám)，in迵(thàng)過太平洋、大(tāi)西洋、地中海、南北極，佇印度洋為著欲採集真珠，閣佮鯊魚相戰；另外一本「丈量(tiūⁿ-niû)世界」塊(teh)講十八世紀德國兩個個性 天差地(thiⁿ chha toē)的科學家(kho-ha̍k-ka)高斯(Gauss)佮洪堡(Humble)，一個宓(bih)佇厝內用紙佮筆算(sǹg)數學、發現定理，另外一個拋拋走，逐(tak)所在行腳到，甚至走去火山口試溫度。…ùi讀冊的過程中，我看著百百款的人生，趣味閣精彩的故事，定定(tiāⁿ-tiāⁿ)攏予我讀甲大喙開開開。

除了尪仔冊、小說(siáu-soat)以外，我感覺學校的教科書(kàu-kho-chu) mā袂(boē)bái，因為伊教咱真濟智識，認捌(pat)做人的道理，才袂(boē)「人牽 毋行，鬼牽 溜溜去」，雖然有當時仔會感覺小可仔(sió-khoá-á)澀澀(siap-siap)，總是對咱的身體無敗害。

有一擺，阿爸共(kā)我講：「加減khioh([撿])，較省共(kā)人借。」我問伊khioh([撿])什麼、借什麼？伊講：「就是khioh([撿])書本予(hō͘)咱的智識a！較袂(boē)頭殼內無半撇(phiat)，閣(koh)愛去四界(sì-koè)共(kā)人問。」

你敢(kám)佮我共款，mā時時享受讀冊的好滋味咧？… 我的演講到遮結束，感謝逐(ta̍k)家。