台語心世界 Tâi-gú Sim Sè-kài

台語演講稿 食暗頓的時陣

淑玲寫ê，我做淡薄仔修改

各位評審，各位來賓，逐(ta̍k)家好，我是第五號，今仔日我所欲(beh)演講的題目是「食暗頓的時陣」。

有一工我放學轉來，「m̂！足芳的！阿母你是佇(tī)灶跤煮啥物好料e，哪會遮爾(chiah-nī)芳？」

「a就今仔日是恁(lín)阿爸的生日，我佇(tī)leh滷豬跤啦。」

莫怪哦！規間厝才會芳貢貢、貢貢芳，想著盈暗欲(beh)食滷豬跤，我就想著一塊囡仔歌，「點仔膠，黏著跤，叫阿爸，買豬跤，豬跤箍仔，kûn爛爛，枵鬼囡仔流喙瀾。」

「好啦！好啦！勿(mài)擱佇(tī)遐(hia)假悾(khong)假戇(gōng)，緊入來鬥相共(tàu-saⁿ-kāng)啦！」

阿母定定(tiāⁿ-tiāⁿ)講，食飯皇帝大，咱人一工食三頓，逐(ta̍k)頓攏真要緊，食了好，讀冊才會無煩惱，毋閣早起頓，恁(lín)總是睏甲日頭強欲(beh)曝尻川，上課就袂赴，欲(beh)哪有彼lō「美國時間」好好仔食一頓；中晝佇(tī)學校食，時間mā是真短，食飯親像塊扒龍船，緊食食咧，愛閣歇晝；所以kan-na偆(chhun)暗頓，會當規家口仔，坐落來好好仔食一頓。

阿母的手藝，就親像孫悟空會曉七十二變，無論是日本的sú-sì、義大利的炒麵、抑(iah)是台灣傳統的料理，對伊來講攏親像桌頂拈(ni)柑 遐爾(hiah-nī)仔輕鬆。像今仔日毋若有豬跤麵線，猶有我上愛食的米粉炒，阿母替我炒一大盤，講欲(beh)予(hō͘)我食甲飽，小妹佇(tī)邊a大聲喝(hoah)，敢有我上愛食的甜不辣，有啦！有啦！今仔日予(hō͘)你食免驚。

除了阿母好食的料理，予(hō͘)逐(ta̍k)家食甲喙仔開開開，mā會當食飯配話，分享我佇(tī)學校的答答滴滴，逐(ta̍k)家講天講地，講鱟瓠(hau-hia)講飯籬(pn̄g-lē)，無論鬱卒抑(iah)是歡喜，艱苦抑(iah)是趣味，攏會當佇(tī)食暗頓的時陣，共(kā)講講出來。

有時陣，阿爸想欲(beh)聽la-jí-ò͘，了解台灣的政治情勢，伊講政治若無注意，有一工天地會掤(péng)去，我佮小妹愛聽地球公民雜誌的CD，內容包山包海，自然、社會、語文、數學逐(ta̍k)項有，豐富閣趣味，阿母愛聽輕鬆的音樂，伊講上班無閒chhih-chhih，一轉到厝閣愛趕緊僎(chhoân)暗頓，實在有夠忝(thiám)，愛放輕鬆才會使。既然逐(ta̍k)家意見無共款，後來阮就約束，一人聽一工，逐(ta̍k)家免相偏(sio-phiⁿ)。

暗頓食了，小妹收碗盤、拭(chhit)桌頂，我負責洗碗盤，因為阮若做一項家事，阿爸阿母就予(hō͘)阮五箍銀。其實做家事mā是老師交代、逐(ta̍k)工愛做的功課，結果我趁著私奇(sai-khia)，閣順紲(sīn-soà)完成作業，真正是一兼二顧，摸蜊仔兼洗褲。

我佮意(kah-ì)食阿母愛心的料理，mā真愛佮厝內的人分享心內的秘密，每一工食暗頓的時，就是我上快樂的代誌。

我的演講著到遮(chia)結束，感謝逐(ta̍k)家。