阮囝參加自然觀察班，攏總五個囡仔，今年國校畢業，這是in訂ê畢業旅行。其他囡仔攏租GIANT ê旅行車，kan-na阮用家己ê車。
6/16先試騎，ùi花蓮火車頭附近沿自轉車道騎到北濱，繼續騎自轉車道到鯉魚潭。轉來了後，先kā A-hông 越野車ê輾仔換做騎公路ê+防刺胎；我ê公路車mā加後壁ê架仔，去買一個袋仔（鞍袋）。另外，買兩領車衣，父仔囝仝樣式，閣買一領長ê車褲。
2010/6/20 Day 1 花蓮-->石梯坪
6/20 7:30集合，8:00左右出發，囡仔5個，有4個老師chhoā，我是唯一綴[tè]囡仔騎ê家長，加起來攏總10個人。
先騎自轉車道到北濱，轉縣道193騎到花蓮大橋轉台11線，12:30左右tī蕃薯寮歇睏、煮麵，下晡繼續騎，15:40左右到第一間Seven(豐濱)，17:20左右騎到石梯坪，昌鴻老師事先連絡好，予阮有旗魚乾佮飛烏乾thang食，閣有食旗魚ê sa-si-mi，了後到露營區，有拄著王清淵，駛車chhoā規家口仔來，in後禮拜mā beh來露營，先來看māi。分配營位，暗時煮mi-so旗魚湯，讚！
食飽了後看影片，今仔日一個囡仔生日，放in媽媽事先錄好ê鼓勵ê話。所有家長攏有錄，kan-na我免，因為是現場Live :)
物件收好已經9點外，洗身軀、整理物件，11:00左右睏。攏總4頂 thiàn-tò͘，我kah阿宏睏一頂。
2010/6/21 Day 2 石梯坪-->都蘭
5:00起床，家己做早頓，7:30左右出發。今仔日是夏至，8點外經過靜浦ê北迴歸線，了後行自轉車道。tih-beh 10點到長濱ê Seven(第二間)。
今仔日透南風，對頭風騎起來小可khah食力，天氣mā真熱。12:50左右tī成功鎮一間媽祖間歇睏(tú-á過石雨傘，台11線107.3K左右)、煮水餃、睏晝。15:00左右繼續出發，16:00左右到成功ê Seven，日頭mā猶閣真mé。17:30左右經過東河包仔，因為猶未到暗時歇睏ê所在，所以無停，補給車有khau轉去買包仔。18:40左右到都蘭派出所，是鐵馬驛站，有三個營位，袂當事先訂，先來先贏，好佳哉今仔日無人kah阮搶。今仔日攏總騎90 thóng khí-lò。
m̄-koh警察叫阮袂使kā孔明車牽入去營位hiâ，kan-na會使khǹg tī公路邊。阮只好kā車頂ê車燈、袋仔攏剝落來，蠓仔當厚，hō͘叮甲真食力。
我那teh kā物件khǹg入營位內底ê時陣，有一隻狗仔kā我ê一雙袖套咬走，我去jiok，伊放掉一條，另外一條猶原咬走，ùi派出所後壁走去，因為天色暗，只好先放棄。
後來昌鴻老師khà電話想法度去連絡著派出所ê主管，in才同意阮kā車khǹg tī in ê停車場。
浴間kan-na一間，所以分批洗，其他ê人煮物件，有脫水機。阮tī營位邊ê所在煮食，有幾lō欉椰子樹，警察叫阮盡量mài tī hiâ停留傷久，驚椰子無張持落落來。
今仔日騎甲尻川會疼，小可煩惱紲落來ê路程。
食飽、討論完、物件收好已經11點外。
因為驚物件閣會予
狗仔咬走，後來睏ê時陣，kā鞋仔攏提去khah懸ê所在khǹg，其他ê家伙，盡量khǹg tī thiàn-tò͘ 內底。
今仔日路上看著真濟hō͘車挵死ê鳥仔，「殕頭硞仔」(灰頭翁)khah choē，koh有一隻，頭是藍色ê，我請昌鴻老師來看，伊有kā我講 鳥仔ê名，總是我記boē起來。
2010/6/22 Day 3 都蘭-->台東-->關山
早起5:00左右起床，我se̍h去派出所後壁，peh 起li，有kā我另外一條袖套chhē著、khioh起來。khioh起來ê時，彼隻狗仔賊頭賊腦khiā tī我邊a。
6:50左右去食早頓，7:30左右出發，8:00左右到小野柳，猶未9:00就到台東市，tī中華路第一間拄著ê Seven歇睏，我買一罐大罐ê sà-sù來灌，tī chiâ歇超過1點鐘，店員真親切，囡仔問伊問題，伊lóng真熱心kā in回答。
後來去全聯補行動糧，tī市區食晝，12:30左右出發，tī初鹿kah鹿野ê Seven有歇睏，17:00左右到關山，toà tī一間民宿ê露營區。下晡開始透北風，天氣涼涼。昌鴻老師有問朋友天氣，鋒面到，花蓮到水尾lóng有落雨，伊驚明仔載去水尾會tú著大雨，請人駛一台車khǹg tī水尾。
暗時去街仔買便當轉來食，昌鴻老師開講ê時，講著台灣自然史一寡趣味ê問題（台灣可能無雲豹、河tāi[櫻花鉤吻鮭]）。
暗時昌鴻老師chhoā囡仔去197縣道做自然觀察，阮4個人留守，去街仔食銼冰。
因為吹北風，暗時真涼，11:30左右睏。
2010/6/23 Day 4 關山-->瑞穗
早起5:00左右起床，6:30左右出發，去街仔食早頓。8點外tī池上ê Seven歇睏，10:40左右到樂合ê Seven歇睏，中晝本成按算tī東豐露營區歇睏，m̄-koh囡仔臨時決定beh拚去水尾露營區（暗時歇睏ê所在），我緊去買一個Vitamin C Jelly。
11:30左右到觀音，12:00左右到春日派出所，本來歇睏一下tō beh走a，內底ê警察出來kah阮開講，koh招阮入去貯水，了後koh請阮食一粒大西瓜，食kah真爽快。 13:00左右才出發，13:20左右到水尾露營區。
小捷ê老父來看伊，後來請食中晝，去街仔食，真chhe-chhau。
teh-beh 16:00轉來到露營區，有落雨，昌鴻老師chhoā in去掠魚，m̄-koh因為落雨，改去泡溫泉，我kah Pa-ni無去，歇睏。
2010/6/24 Day 5 瑞穗-->花蓮
早起5:00左右起床，家己chhoân早頓，tih-beh 8:00 出發，經過光復糖廠有歇睏，到鳳林，臨時決定無beh歇，se̍h入去內底ê路，穿過兆豐農場出去（中央有去一個看鳥仔ê祕密基地）tī 路口ê 全家歇睏，李周ê父母有來，後來李周ê爸爸陪騎到豐田，請阮食飯，了後se̍h入去小路，經過門諾壽豐園區，ùi理想大地khau出去台11丙線，過東華了後有落雨，李周ê爸爸騎到花蓮大橋kah阮分開，阮ùi光華工業區入去自轉車道。
到北濱公園了後我先離開，騎轉來厝e，簡單洗身軀，駛車去洄瀾風，in當teh辦歡迎活動。
這pái環花東，雖然無頂pái 300K hiah-nī thiám，總是mā真thiám。以後若是有機會，敢koh beh耍一遍？考慮中。
全站熱搜
留言列表
