台語心世界 Tâi-gú Sim Sè-kài

這暫仔發現我ê血壓傷過懸，實在予人煩惱。

今仔日早起9點左右，代誌做甲一个坎站，量血壓看覓，koh chhèng到150外，想想leh，性命愛顧，工課先tàn一邊，物件小chhoân一下，就騎孔明車beh出門，想beh騎去太管處（離阮兜大概25 khí-lò͘ ，腳踏車距離，Google算ê，看路線圖)，順紲復習大山大海ê形影，這个我iáu-koh m̄知有緣份蹛外久ê城市。

進前chhoā囡仔騎，往回愛一工，彼工風真透，騎甲真食力。今仔日天氣好，無啥雲，春天到a。

離家20分鐘（腳踏車時間）ê景緻，遮是四八高地，看七星潭ê好所在。

過七星潭了後ê 193縣道，路邊有時會聽著si̍t-si̍t-su̍t-su̍t ê聲音，這是杜定，春天是杜定ê季節。

春天koh是苦楝開花ê季節。

春天mā是血桐開花ê季節。

Koh有無頭藤[菟絲]佮林投。

海檨仔[海檬果]。

193縣道，車少、景緻好。

9:30左右出發，中央kan-na tī過七星潭，193縣道 4 khí-lò͘  附近ê所在歇一下。出三棧行一屑仔台9線，隨koh khau入去秀林，較倚山邊ê小路。

番麥田。

看著一區田，除了稻草人，koh做鳥仔ê模型，按呢嚇驚鳥仔ê效果m̄知有較好無？

到太管處遊客中心大概11:00左右。

腹肚已經枵甲kī-kā叫。M̄-koh 我mā kan-na chah一塊餅，兩喙bán-thô͘ [饅頭]（早頓食chhun ê）佮一莢[ngoeh]細莢、不結不結ê芭蕉。今仔日無啥人，真好，有看著日本觀光客，koh有香港人ê款，in khah袂像中國客遐爾吵。

歇睏10幾分鐘，就起行，往轉去ê路。今仔日是beh來降血壓ê，m̄是來chhit迌ê。

其實頂面ê相片攏是轉去ê路上才翕ê，除了稻草人彼張以外。

轉去ê路上因為沿路停落來翕相，今仔日吹南風，是對頭風，所以加chhiân 20分鐘左右。本成koh想beh khau過去大漢，離開半冬外，m̄知有我ê批寄去遐無？Mā thang順紲去看同事佮學生，結果敲電話去無人接，拍算in mā koh tih歇睏。

13:00 khah thóng到厝，量血壓，降到 140左右，猶是真懸，實在予人煩惱，m̄-thang包傷濟工程a。

Koh來愛chhoân中晝頓、披衫、曝棉被，跤痠mā是愛振作，後壁koh有規大拖ê工課。

(soah)