下課囉
珍惜下課十分鐘，培養快樂的好心情。各位評判先生、各位囡仔兄、囡仔姐，逐家好，我是第六號，今仔日我所欲講的題目是：下課囉。
叮咚叮咚，美妙的下課鐘仔聲已經響a，阮的心情嘛即時變快活，因為阮每一節的上課攏愛坐四十分鐘的[硬]椅仔，坐甲是腰酸背痛、唅腳倉嘛強欲開花a，所以一聽著下課的鐘仔聲，阮就用期待的眼神，掠老師金金看，老師知影阮的心聲，就大聲喝：下課囉。
一下課，足儕同學就親像一群野馬，兇兇狂狂涸涸闖，不管三七二十一衝a衝，目nih仔囝就走甲無看影。有的是欲去佔一個好位玩予夠氣，有的欲去拍籃球，有的欲去幌 韆鞦，歸個學校那菜市仔，鬧熱刺插。我嘛輸人不輸陣，參我的死忠兼換帖的走去到外面，外口的空氣遮呢好，閣有遮儕所在好[玩]，下課的時間若無好好仔利用，真正算袂和。
行行行，無行袂出名，先來去補充體力的福利社。到位一下看，阿娘喂~~福利社的人哪會赫呢儕。內底[擠][擠][擠]，外口閣排幾a十個，有的是欲買簿仔，有的是欲買好食物仔，有的是欲買飲料通止嘴乾，予賣物的郭媽媽無閒甲霧sa-sa，為著無想欲予人[擠]一下變肉餅，只好繼續來去外口四界行、四界看。行a行，行來到尚鬧熱的運動埕，看著誠儕同學攏佇遮，有的[在]踢腳球，有的[在]走相[逐]，踢腳球的喝甲大細聲，走相[逐]的咧拚輸贏，逐家闖來闖去，闖甲大粒汗細粒汗，一個面紅甲親像關公大老爺，阮徛佇邊仔恬恬看，看踢腳球的同學咧大車拚，球賽愈來愈精彩，雄雄哪會看著一腳鞋仔對半空中飛過來，逐家是笑甲嘴仔裂sai-sai，險險仔就落下頦。球賽雖然好看，抑不閣曝日有夠熱，抑是來去涼涼的樹仔腳，阮下課的時陣[常常]攏來遮，講天、講地、講笑話，有時嘛會[玩][躲]相尋、跳索仔、唸囡仔歌，逐家攏[玩]甲滿面春風，笑瞇瞇，心情快樂無地比，歸個疲勞嘛攏予風飛飛去。
叮咚叮咚，hann~~，那像 才目一下nih nia就又閣欲上課a，阮愛趕緊入去教室坐予好，準備下一節的上課，下課的時間雖然無外儕，抑不閣就親像一帖強心劑，予阮精神百倍，佇下課十分鐘內底，咱會當做的代誌嘛有夠儕，會當好好仔歇睏、消除疲勞，會當看課外冊、增加智識，嘛會當佮咱的好朋友做夥[玩]，予感情愈好，真正是一兼二顧 摸蜊仔兼洗褲。
所以，我愛下課，我嘛希望咱逐家攏會當好好仔珍惜下課十分鐘，培養快樂的好心情，予咱下一節的上課閣較有精神、閣較認真，盡著咱做學生的本份，我講到遮，感謝各位！
留言列表
