台語心世界 Tâi-gú Sim Sè-kài

代為轉貼

(台文版)

針對教育部用「閩南語」指稱「台語」ê聲明──呼籲

請尊重「台語」m̄是「閩南語」ê事實

台灣基督長老教會台灣族群母語推行委員會

    咱知影最近tī國小教台語ê教師提著出版社送ê教材樣冊，原本用「台語」名稱ê教材，因為國立編譯館一張公文kā出版社施壓，soah被迫全部改名做「閩南語」。針對這項代誌，本會徛tī《台灣基督長老教會信仰告白》實踐「釘根tī本地，認同所有住民」kap《2010年台灣基督長老教會台灣國是會議宣言》所講ê時代使命之一：「實踐台灣主體kap國家認同ê宣導kap教育」，慎重呼籲教育部m̄-thang違背民意、執死訣。成做負責教育政策ê中央部會，應該尊重kap保障台灣各族群ê多元文化kap挽救ta̍uh-ta̍uh衰微ê在地族群母語。阮聲明：

    一、「台語」這個詞使用超過一百冬--ah：日本時代到這陣，已經是約定俗成ê稱呼。

二、「台語」是代表台灣國家ê「一種」語言：台灣有超過百分之七十ê人口使用「台語」，照一般國家ê慣例，自然以這個族群語言代表台灣ê語言。Kā這款語言號做「台語」，並無影響客家語kap原住民語仝款是台灣語言ê意涵。

三、「台語」m̄是「閩南語」：現此時ê「台語」雖罔有對中國閩南語來ê成分，m̄-kú因為歷史因素有吸收平埔語、荷蘭語、西班牙語、日本語等等成分，早就hām所謂ê「閩南語」無仝款；閣再講，「閩南語」其實並m̄是單單指一種語言，甚至「閩南」嘛有客家語，「閩南語」根本m̄是精確ê指稱。

教育部tī舊年舉辦ê「台灣閩南語」語言能力認證，到今年soah改名做「閩南語」語言能力認證，理由講是配合「國民中小學九年一貫課程綱要」所使用「閩南語」ê稱呼來調整，問題是「閩南語」根本是無合事實ê指稱。

本會一向推行台灣各族群母語真拚勢，搶救強欲滅亡ê語言文化，tī chia呼籲教育部應該徛tī台灣主體性ê立場，認清「台語」m̄是「閩南語」ê事實，尊重台灣大多數人民使用「台語」名詞ê權利，mài閣再繼續使用「閩南語」指稱「台語」。                                           

2011年5月27日

發稿連絡人：陳豐惠(台灣基督長老教會台灣族群母語推行委員會委員)，手機號碼：0930067228