台語心世界 Tâi-gú Sim Sè-kài

台語演講稿 02 若準時間會當重來

各位評審，各位來賓，逐(ta̍k)家好，我是第一號，今仔日我所欲(beh)演講的題目是「若準時間會當重來」。

逐家真愛看的哆啦A夢影片內底，主角若是拄(tú)著問題，哆啦A夢就會用時光(sî-kong)機器tshuā in轉去過去抑是走去未來，予我感覺足欣羨(him-siān)的。若準時間會當重來，你想欲做啥物leh？

若準時間會當重來，我想欲轉去五個月前，彼陣我佮幾個好朋友，欲騎孔明車踅(se̍h)花蓮台東一輦(lìn)，阮先ùi海線騎到台東，tsiah-koh行山線轉來花蓮。俗語話講，看人擔擔(tann-tànn)袂食力，無騎m̄知，一騎tsiah知艱苦，第一工透中晝koh拄著連紲(suà)幾lō公里的大peh崎(kiā)，逐家騎甲phī-phē喘、哀哀叫。人講六月火燒埔，日時有赤燄的日頭，暗頭仔有趕袂走的蠓仔(báng-á)；幾工落來，逐家騎甲是跤酸甲、尻川疼甲、汗mā攏拚了了。總是拍斷手骨顛倒勇，逐家鬥相脛(sio-kīng)，一步一步踏向前(tsîng)，沿路mā有真濟無熟似的朋友共阮加油鬥贊聲。經過五工的考驗，阮騎完400公里的路程。汗流sàm滴了後的成功，滋味是甜but-but，連眠夢就會偷笑。

若準時間會當重來，我想欲轉去細漢的時陣，kā我一寡歹習慣改掉。我寫功課gâu拖沙，定定(tiānn-tiānn)寫到一半，就偷偷仔看尪仔冊抑是畫圖，致到功課寫真久，甚至會真晏睏。有時予爸母tsang--tio̍h，in會kā我講，每一個人一工攏是二十四點鐘，你若一工加了人一點鐘，年久月深，加起來就真驚人，一晃(huánn)過三冬，三晃(huánn)一世人。In塊唸我的時陣，我攏會氣tuā-tuā，tsit-má斟酌kā想，我mā確實因為無把握時間，代誌做袂完，失去一寡參加活動的機會，實在是足拍損e。

若準時間會當重來，我想欲轉去30冬前、60冬前、300冬前的台灣。有的所在，明明是規片(phiàn)全全厝，阿爸煞講這搭仔較早一四界攏是田；阿公講伊讀初中的時，逐工愛ùi厝li行三點鐘才會到學校，驚皮鞋穿歹去，只好褪赤跤行，到學校tsiah kā皮鞋穿起來，這款情景，我實在無法度體會。Koh有社會課本講，台灣古早是美麗島，逐年出口真濟鹿仔皮，m̄-koh，我kan-na佇動物園內底看過鹿仔niā-niā。

若準時間正經會當重來，我會當koh感受一擺流汗的滋味，會當改掉浪費時間的歹習慣，mā會當轉去看古早的台灣，啊！實在是一兼三顧，摸蜊仔兼洗褲，歡喜koh袂艱苦，按呢m̄知有外呢仔好leh。

M̄-koh阿母kā我講，空想(khang-siūnn)陷眠(hām-bîn)無彩工，跤踏實地才有望。有影啦，想罔想，猶是較早睏較有眠，通(thang)有氣(khuì)力好好仔讀冊。

我的演講到遮(tsia)結束，感謝逐(ta̍k)家。