昨昏,我利用台中轉花蓮ê時陣,tī台北短暫停留,去拜訪張裕宏教授。幾工前,伊ùi阿惠hiâ知影我kā大漢ê教職辭掉,特別khà電話kā我關心。koh兩禮拜外伊tō beh 過去美國,伊想講我無閒,大概這pái無機會見面,伊想beh kah我討論華台辭典ê編輯空課。

我躊躇一下,試幾lō pái,有換著拜五暗時台北轉花蓮khah oàⁿ ê火車。所以拜五上完中教大ê課了後,坐火車去台北,tō盤捷運去chhē老師。下晡四點外。

我感覺老師有khah sán,氣色猶閣boē bái。

老師做代誌真頂真,舊年chiah出版ê白話字小詞典,伊已經koh lia̍h出一寡問題,希望第一版緊賣完,thang hō͘增補後ê第二版會當出版。了後,伊想beh出兩萬外詞ê華台辭典,照ㄅㄆㄇê順序來排。TeX格式ê部份,我可能先kā hiâ ê標記the̍h掉,因為Word khah choē人會曉,TeX tō真少。伊講lóng hō͘為文無閒,真歹勢。m̄-koh,至少為文hiâ有專任助理。出版ê代誌,我愛連絡為文。

另外,阿鳳姨第二版mā已經有600+篇a。這部份我真期待,我答應來連絡出版ê代誌,mā有討論一寡細節ê問題。

伊講,假使伊走a,伊真煩惱chiâ ê物件tō無去a...

伊有轉hō͘我一張Email,講英文拼音ê問題ê。為著開電腦、上網,開足choē時間。伊mā有提起La Fontaine(拉封丹) ê Fable,hō͘我想起進前有想beh kā改寫做台語ê往事,這pái愛趁上台語課ê機會來實現這層代誌。Koh有提起GGI kah INN。

伊kā我講,伊應該對白話字有一寡貢獻。天良講,ùi白話字基本論到阿鳳姨ê五度ê空間到白話字小詞典,伊ê貢獻足大。咱lóng盡心盡力為白話字,為咱ê語言拍拚。

我kā老師借李氏台語辭典,這本書是李豐明替in老父李春祥編ê,兩冬外前我tī國圖看過,總是已經買無。後來,老師請我去師大附近食素食,尤其推薦我食潤餅kauh。食soah ê時,我請後壁桌ê少年家用我ê新手機仔kā阮兩人翕相。我第一pái kah老師翕相。

了後,kā伊講再會,我去趕火車轉花蓮。

雖然身體感覺真thiám,m̄-koh心情真快活。


Tiunn Juhong ks

arrow
arrow
    全站熱搜

    ungian 發表在 痞客邦 留言(1) 人氣()