台語心世界 Tâi-gú Sim Sè-kài

2006年歇熱，台灣羅馬字協會tī台灣人權地標之一ê綠島辦世界台語文化營，當其時ê理事長蔣為文教授邀請考試院姚嘉文院長來做專題演講，討論台語文發展ê議題，這是guá第一擺kah院長面對面接觸，mā tsiah知影院長長期以來lóng有teh關心台語文ê發展。
營隊後，guá繼續kā院長攪吵，pún-tsiânn是請教國家考試增加本土語言試題ê問題，後來話題講對「台灣七色記」去，guá感覺若會當kā翻寫做台文實在是tsiânn讚，院長mā同意，總是七色若lóng beh kā翻寫，實在無夠氣力，hit-tsūn我iah-koh tuà花蓮，就提議揀「藍海夢」，因為i ê故事背景就tī花蓮。
引著這條khang-khè ê時，guá koh teh讀博士班，壓力不止大，驚家己一人做buē來，就招德樺kah寶漣tàu-sann-kāng，in翁仔某lóng是真拚勢ê台語文工作者。院長招gún去i ê官邸食飯，討論用字ê共識，可比「我guá/阮guán」、「你lí/恁lín」、「伊i/in」，這是單、複數ê對應，寫漢字無感覺，m̄-koh若寫羅馬字，這个對應就tsiânn清楚（單數+n=複數），所以決定人稱代名詞lóng用羅馬字。
經過將近一年，21萬外字ê台文版初稿完成，因為翻寫kah校對，guá自頭到尾至少有斟酌kā讀過兩pái，一个 giâu疑是，照guá個人對花蓮地勢ê了解，kài sîng tshē無小說內底石崙這个所在，特別向院長確認。院長講確實無m̄著，因為hit-tsūn teh坐監，石崙是想出來ê，無影有這个所在。
「藍海夢」是長篇小說，結構完整，劇情ê鋪排真幼路，小說內底一kuá人物teh討論時局ê氣口，略仔感覺會出院長伊律師ê特質，條理分明，思考冷靜，一个問題會當píng幾lō pîng來kā想、kā看。講實在，guá感覺院長是學者（實際上mā確實是），足無sîng lán一般人所認知ê政治人物。
翻寫、校對好勢了後，海翁台語文學雜誌tī 2008年7月開始連載一冬外，本tsiânn按算連載結束了後就beh出版，suah因為guá個人ê因素（提學位、換頭路、搬厝等等），無好好仔來聯絡，一huánn koh過三冬。最近台灣社相關社團來埔里聚會，請逐家用「guá有一个夢」做主題發表家己ê想法，院長就講，i ê夢就是這本冊緊出版。Kāng款坐tī遊覽車頂，guá感覺對院長實在tsiânn歹勢。
華文版原著出版到tann，已經超過25冬，總是台灣人對自身認同iah-koh無明確，siunn tsuē台灣人tuà tī西部，buē記得台灣koh有將近一半ê海岸線是面對曠闊ê太平洋。
請讀者耐心kā讀落去，靜靜來感受25冬前，一位tú出獄ê政治受難者，利用小說ê形式表達出伊對台灣ê phah死m̄退ê愛kah疼心，希望lí mā是受感動ê其中一个。

(繼續閱讀...)

ungian 發表在痞客邦留言(0) 人氣(84)