鯉魚潭、七星潭兩潭自行車道踏查記錄07-榮光社區到吉安溪出海口
榮光社區是一個較舊的社區，當初自轉車道經過遮，引起一寡議論。Ùi榮光社區se̍h出來，接到193縣道，這段算危險路段。
Êng-kng siā-khu siō chi̍t ê khah kū ê siā-khu, tong-chhoe chū-chóan-chhia-tō keng-kè chiâ, ín-khí chi̍t-kóa gī-lūn. Ùi Êng-kng siā-khu se̍h --chhut-lâi, chiap kàu 193 kōan-tō, chit tōaⁿ sǹg gûi-hiám lō͘-tōaⁿ.
193縣道行一小段，猶未到吉安溪橋，就愛正斡入來，這段原來是予人行的，m̄是自轉車道，有幾個所在彎直角。
193 kōan-tō kiâⁿ chi̍t sió tōaⁿ, iah-bē kàu Kiat-an-khoe-kiô, tō ài chiàⁿ-oat --ji̍p-lâi, chit tōaⁿ gôan-lâi sī hō͘ lâng kiâⁿ ê, m̄ sī chū-chóan-chhia-tō, ū kúi ê só͘-chāi oan ti̍t-kak.
吉安溪出海口，倒爿是南濱公園。
Kiat-an-khoe chhut-hái-kháu, tò-pêng sī Lâm-pin kong-hn̂g.
吉安溪邊ê水牛。
Kiat-an-khoe-piⁿ ê súi-gû.
橋頂ê景緻。
Kiô-téng ê kéng-tì.
橋頂看落來，較停仔車愛牽落去，有一個直角。
Kiô-téng khòaⁿ--lo̍h-lâi, khah-têng-á chhia ài khan --lo̍h-khì, ū chi̍t ê ti̍t-kak.
彼個直角進前，閣愛彎這個尖角。假使有人會當騎落去，實在是傷過厲害a！
Hit ê ti̍t-kak chìn-chêng, koh ài oan chit ê chiam-kak. Ká-sú ū lâng ē-tàng khiâ--lo̍h-khì, si̍t-chāi sī siuⁿ-kè lī-hāi a !
牽落來了後，總算轉來到正常的自轉車道a。看著這塊斷去的大理石牌仔，感覺特別譏刺。這款品質的自轉車道，beh趕tī落台進前通車，干焦為著beh留家己的名，kā逐家講這是伊任內ê政績。可惜猶無一月日，就斷頭a。
Khan --lo̍h-lâi liáu-āu, chóng-sǹg tńg-lâi kàu chèng-siông ê chū-chóan-chhia-tō a. Khòaⁿ-tio̍h chit tè tn̄g--khì êtāi-lí-chio̍h pâi-á, kám-kak te̍k-pia̍t ki-chhì. Chit khóan phín-chit ê chū-chóan-chhia-tō, beh kóaⁿ tī lo̍h-tâi chìn-chêng thong-chhia, kan-na ūi-tio̍h beh lâu ka-kī ê miâ, kā ta̍k-ke kóng che sī i jīm lāi ê chèng-chek. Khó-sioh iah bô chi̍t ge̍h-ji̍t, tō tn̄g-thâu a.
21 khí-lò͘ ê牌仔。遮tī南濱公園ê範圍內。
Jī-cha̍p-it khí-lò͘ ê pâi-á. Chiâ tī Lâm-pin kong-hn̂g ê hōan-ûi lāi.
吉安溪邊。
Kiat-an-khoe-piⁿ.
吉安溪出海口。
Kiat-an-khoe chhut-hái-kháu.
翻頭向南爿看，顧海防ê厝後壁就是化仁駁岸ê自轉車道。本成是beh ùi我徛ê遮做一條橋hāⁿ過吉安溪，聽講是工程流標。既然按呢，自轉車道就無應該著急beh開放，顛倒予騎ê人感覺這段路騎甲真袂爽快。遠遠ê山是海岸山脈。
Hoan-thâu ǹg lâm-pêng khòaⁿ, kò͘ hái-hông ê chhù āu-piah tō-sī Hòa-jîn poh-hōaⁿ ê chū-chóan-chhia-tō. Pún-chiâⁿ sī beh ùi góa khiā ê chiâ chòe chi̍t tiâu kiô hāⁿ kè Kiat-an-khoe, thiaⁿ-kóng sī kang-têng liû-pio. Kì-jiân án-ne, chū-chóan-chhia-tō tō bô èng-kai tio̍h-kip beh khai-hòng, tian-tò hō͘ khiâ ê lâng kám-kak chit tōaⁿ lō͘ khiâ kah chin bōe sóng-khòai. Hn̄g-hn̄g ê soaⁿ sī hái-hōaⁿ soaⁿ-meh.
留言列表
