台語心世界 Tâi-gú Sim Sè-kài

大稻埕進行曲 Tuā-tiū-tiânn tsìn-hîng-khik

 作曲 冉天豪 作詞 王友輝

大船碼頭世界行，茶行鹽館淡水岸
tuā-tsûn bé-thâu sè-kài kiânn, tê-hâng iâm-kuán Tām-tsuí-huānn

藝旦美麗的形影，江山樓頂拚輸贏
gē-tuànn bí-lē ê hîng-iánn, Kang-san-lâu-tíng piànn su-iânn

波麗露啊山水亭，自由的思想上時行
Poo-lé-lòo ah San-suí-tîng, tsū-iû ê su-sióng siōng sî-kiânn

文學歌謠美術佮電影，無論啥物 阮是攏無驚
bûn-ha̍k kua-iâu bí-su̍t kah tiān-iánn, bô-lūn siánn-mé gún sī lóng bô kiann

攏無驚啊攏無驚，文明的跤步愛踏予定
lóng bô kiann ah lóng bô kiann, bûn-bîng ê kha-pōo ài ta̍h hōo tiānn

in是台北城外，繁華的現代大稻埕
in sī Tâi-pak-siânn-guā huân-huâ ê hiān-tāi Tuā-tiū-tiânn

攏無驚啊攏無驚，文明的跤步著愛踏予定
lóng bô kiann ah lóng bô kiann, bûn-bîng ê kha-pōo tio̍h-ài ta̍h hōo tiānn

in是台北城外，繁華的現代大稻埕
in sī Tâi-pak-siânn-guā huân-huâ ê hiān-tāi Tuā-tiū-tiânn


二十世紀向前行，文明行入台北城
jī-tsa̍p sè-kí hiòng-tsiân kiânn, bûn-bîng kiânn ji̍p Tâi-pak-siânn

美麗花都的形影，欲佮東京拼輸贏
bí-lē hua-too ê hîng-iánn, beh kah Tang-kiann piànn su-iânn

烏貓姊啊烏狗兄，跳舞的跤步著愛踏予定
oo-niau tsí ah oo-káu hiann, thiàu-bú ê kha-pōo tio̍h-ài ta̍h hōo tiānn

自由開化peh山又過嶺，無論啥物阮是攏無驚！
tsū-iû khai-huà peh-suann iū kuè niá, bô-lūn sím-mih gún sī lóng bô kiann!

攏無驚啊攏無驚，跳舞的跤步愛踏予定
lóng bô kiann ah lóng bô kiann, thiàu-bú ê kha-pōo ài ta̍h hōo tiānn

阮是台北城內，文明的烏貓烏狗兄
gún sī Tâi-pak-siânn-lāi bûn-bîng ê oo-niau oo-káu-hiann

攏無驚啊攏無驚，跳舞的跤步著愛踏予定
lóng bô kiann ah lóng bô kiann, thiàu-bú ê kha-pōo tio̍h-ài ta̍h hōo tiānn

阮是世界一等，摩登的烏貓烏狗兄！
gún sī sè-kài it-tíng, môo-ting ê oo-niau oo-káu-hiann