上課用台語、畢業前愛通過台語認證ê
台中教育大學台灣語文學系簡介
首都詩報第12期, 2011.9.15
楊允言
2000~2008年，民進黨政府執政ê時陣，因為南社ê運作，教育部補助真濟學校成立台灣語文相關系所。其中有ê予學校烏龍se̍h桌choa̋ⁿ無去，有ê予彼間學校ê中文系ngeh去配（你若看in ê老師ê研究方向是詩經、左傳、華語兒童文學、…，心肝敢袂凝？）。2008年，國民黨政府提著政權，可能台灣語文相關系所算是政治無正確，有ê倒去，有ê無倒去m̄-koh soah kiu去，予其它ê系所合併。遮ê情形，lóng予咱感覺真怨嘆。
按呢看起來，2004年成立ê台中教育大學台灣語文學系，無的確算是這波台灣語文相關系所內底特別健全ê一个系，kan-na講一點：80%以上ê課lóng用台語來上課，就thang好贏人忝忝a，雖然tī台語系用台語上課實在是無應該提出來展。
根據系ê簡介，有提起這个系雖然m̄是台灣第一个台語系，m̄-koh是第一个台灣語文師資培育專業學系。伊tī 2004年成立ê時陣，當其時ê副總統呂秀蓮女士特別有來學校主持揭牌ê儀式，其他ê貴賓，包括張炎憲（國史館館長）、莊萬壽（台師大台文所所長）、廖永來、張溫鷹、…等等。
創系系主任是洪惟仁，其實我khah愛講這，因為伊長期以來lóng teh做台語文運動，系ê制度佮課程ê建立，佮伊有真大ê關係，尤其是課程ê設計佮對學生ê要求，這予我感覺伊是正港ê台語系，m̄是掛台語系khǎn-páng ê中文系。
這个系對beh畢業ê學生有3个要求，第一是愛做校外ê服務學習，第二是愛交畢業作品，第三上重要，愛通過台語、客語、英語、日語四種語言ê檢定。
台語ê部份，愛通過成大台灣語文測驗中心抑是教育部台語檢定中高級，客語ê部份，愛通過客委會ê客語認證初級抑是中級100分以上，日語ê部份，愛通過日本國際教育協會佮國際交流基金會聯合主辦ê日語檢定五級，抑是四級成績200分以上，英語ê部份是學校對所有大學部學生ê要求，愛通過全民英檢中級抑是仝等級ê認證。四語檢定，是中教大台語系khah特別ê所在，予畢業ê學生會當有基本ê本土語言能力，mā有一般ê外語能力。
課程ê設計，佮其它台語系無仝ê所在是，遮ê學生分做語言文學組佮藝術文化組，語言文學組讀khah濟理論方面ê課程，為未來考研究所抑是相關公職考試拍底蒂；藝術文化組khah注重表演，阮有歌仔戲、布袋戲表演實務ê課程，聘請民間戲團ê團長抑是負責人來上課，mā有口語傳播ê課程，訓練廣播方面ê實務經驗。
學校有台灣戲曲社佮布袋戲社，lóng是台語系ê學生成立ê，台灣戲曲社除了校內ê公演，今年4月koh有去台北大龍峒保安宮參與「2011保生文化季家姓戲匯演」，是參加演出ê戲團內底唯一一團學生社團；khah拍損ê是，我2010年來這个系教書，布袋戲社因為囡仔無意無意，趕tī我入來進前宣布倒社。這其實mā是我看著ê危機，傳統戲曲beh透過m̄是讀戲曲學校ê一般大學學生來傳承，看起來不止仔困難。
課程ê部份，有一个我感覺真歹剃頭ê問題，就是評鑑。評鑑是請專家來診斷這个系ê發展是m̄是有甚麼特色、問題抑是需要改進ê所在，用一寡客觀ê標準來看相關系所ê發展情形。台灣語文相關系所算新系所，規个方向、目標可能猶閣m̄是真穩定，評鑑委員ê背景mā有一寡差異。問題來a，評鑑ê時陣，文學方面ê委員就講阮文學ê課傷少，愛增加，客家方面ê委員就講阮客話ê課傷少，愛增加，…，逐家lóng按呢。若照in ê建議舞落去，到時台灣語文相關系所可能lóng無特色a，課程親像雜菜麵，我感覺對這个系是有傷害ê。一般大學部ê課程，一門課大概lóng是三學分，阮為著愛khǹg真濟無仝類型ê課入來，有袂少ê課是兩學分ê。假使評鑑委員是來亂ê，系ê生死koh lak tī評鑑委員ê手頭，按呢台灣語文相關系所ê前途實在是予人煩惱。
師資ê部份，創系系主任洪惟仁老師今年退休，目前有6个專任老師，佮幾lō个兼任老師。專任老師內底至少有3个是做台語文運動ê，這mā是中教大台語系真要緊ê特色，學院會當培養專業ê師資，soah未必會當培養出對專業有熱情ê師資。另外，林茂賢老師是台灣文化方面足大仙ê先覺，伊開ê「台灣文化概論」，要求修課同學愛去行媽祖，體驗台灣民間ê信仰、熱情佮性命力。
我應徵這个系ê時陣，系上要求愛有本土語言ê作品，mā愛交用本土語言錄音ê自我介紹，thang看出這个系要求老師愛有用本土語言上課ê能力，這點可能mā是佮其它台灣語文相關系所無仝款ê所在。
來遮教書，我上歡喜ê就是會當用台語上課，這是心靈ê tháu放，別位無地比。遮開ê課，語言學概論、台灣史、原住民歷史文化，甚至電腦課，課堂ê語言lóng是台語。
根據觀察，學生互相溝通ê時所使用ê語言猶是華語，古早進前咱受著國民黨政權語言迫害，tī學校袂使講台語，若無著愛罰錢抑是掛狗牌，這馬時勢改變，講台語袂hǒng罰錢soah無人beh講，台語系tú-á成立ê時陣，洪惟仁主任為著beh愛學生講台語，tī系辦chhāi一个罐仔，頂面貼：「講華語罰10箍」，上課ê時若講華語，就愛來遮lok 10箍銀，總是我來ê時陣已經無塊實行。
學生經過4冬ê訓練，系所開ê課程，老師上課ê時所使用ê語言，80%以上用台語（包括部份ê客語），經過按呢ê訓練，台語ê能力普遍比人khah強，逐年ê全國語文競賽，m̄管是台語、客語ê演講抑是朗讀，lóng有boē bái ê成績。學生tī讀書期間所交ê作業，有ê規定愛用台文來寫，台文ê作業比例，應該mā是台灣上懸ê。
本來有規劃beh成立研究所，m̄-koh因為教育部ê政策是總量管制，beh招一个研究生，愛用兩个大學生來換，目前ê時勢看起來有困難。逐屆大概有10个畢業生考tiâu其它學校相關ê研究所，拍算是去到新所在，台語聽課ê機會變少，心肝頭鬱卒，有ê同學走轉來系上投，講猶是遮ê師資khah好。
學生是按怎beh來讀台語系？我有問過一寡同學，當然有ê人是填志願tú好tiâu著遮，就按呢來讀a，mā有袂少ê同學是透過甄試入來ê，有ê同學tī高中進前，因為參加演講抑是朗讀比賽，對本土語言誠有趣味，所以選擇來遮讀。
學生讀台語系，tī讀書ê期間，加減lóng會受著其它系ê同學ê質疑，問in講：讀台語系有啥路用？有ê同學心內mā膽膽，m̄知畢業了後beh做啥頭路，我lóng kā in講，其實讀其它系mā仝款，對大部份ê人來講，大學所讀ê科系佮以後出社會做ê頭路，無一定有直接ê關係，讀大學是訓練你ê專業能力、學習能力，佮你看這个世界ê態度佮立場，若是畢業了後按算tī台灣食頭路，其實台灣本土語言正正是基礎而且關鍵ê能力，tī大學koh加講四冬ê華語，華語能力袂進步外濟，m̄-koh大學學四冬ê台語，就已經贏人足濟足濟。
以上是我所知影ê台中教育大學台灣語文學系。
留言列表
