這是中教大台一甲ê校外服務學習,因為台中地頭無熟,後來決定tè茂賢老師去行媽祖。茂賢老師ê課,要求修課ê同學愛去行媽祖,包括中教大佮靜宜ê學生,直接交予茂賢老師ê助理,協助叫遊覽車佮辦保險,按呢加足省事。

http://web.pu.edu.tw/~folktw/news/bulletin/mazu_travel_2011.pdf

4/10 暗時我趕火車來台中,4/11 一透早就起床,緊趕來學校,kā分組名單印出來,6:50去集合地點 http://goo.gl/maps/kxq6

7:15 左右出發,想袂到遐爾早,中港路mā是窒車。Tī車頂先看大甲媽ê影片,車tī西螺休息站歇15分鐘,9:00左右車到元長[Goân-chióng],放阮落車,tī路邊等待,看頭香、二香、三香、贊香ê車隊通過。有一个阿伯提草仔粿來beh分予逐家食,我提一塊,這是我今仔日ê旅行ê錯誤ê開始  :(

了後,顏清標mā出現,佮人翕相,學生戇戇仔佮伊翕,我tìⁿ恬恬,徛tī邊a。

無外久,大概9:45左右,媽祖到a,阮緊跪落來,nǹg轎跤啦!

Nǹg過了後,開始塊隊伍行,路邊家家戶戶lóng排桌仔chhoân果子tih拜拜、燒金紙,沿路有免費ê飲料,我提一罐維他露P,錯誤ê第二步。

今仔日罩濛,所以日頭無大,行起來較輕鬆。我對炮仔聲、薰ê味敏感,明年若koh來行,我愛chhoân 耳窒仔佮喙om。

 

我翕ê相片khǹg去 FB ê相簿,我ê Google ê網路相簿滿a,所以愛換所在

http://www.facebook.com/album.php?fbid=206002329424328&id=100000436864661&aid=53923
http://www.facebook.com/album.php?fbid=206009396090288&id=100000436864661&aid=53926

 

我特別想欲翕年歲真大m̄-koh足虔誠ê老阿媽。我看著真濟阿媽跪落去佮peh起來攏有困難,需要邊a ê人kā huānn,看loh真m̄甘。當然,大部份時間烏白翕。

有錯誤ê第一步佮第二步了後,繼續錯誤落去... 規工落來,我攏總食著草仔粿、麻糬、番麥、仙草、粉圓、羹、甘蔗汁、薑母茶、西瓜、礤冰、菜包、饅頭、山粉圓、飯菜、菜頭湯、紫菜湯、維他露P、保力達P、果菜汁、礦泉水、青草茶、洛神花茶、冬瓜茶、王梨冬瓜茶、白木耳湯、... 拍算koh有一寡落勾ê。Koh有人送我抹痠痛ê藥仔。

我食甲遮爾無站節,媽祖婆敢會保庇我袂著胃腸炎?

腹肚其實足飽a,m̄-koh有時仔感覺無食拍損,有時仔是感覺辜負別人ê心意歹勢歹勢。

我其實上想beh食人排tī桌頂ê果子 :)

宗教信仰是台灣社會ê特色,透過宗教,生份人tī這个時陣變足親ê。較趣味ê是,因為利益,真濟大間廟ê管理委員會,加減lóng有一寡烏道背景。咱透過烏道ê幫贊,恢復台灣社會ê人情味。真正ê,這比政黨ê動員力較強。

創作者介紹

台語心世界 Tâi-gú Sim Sè-kài

ungian 發表在 痞客邦 PIXNET 留言(0) 人氣()