這是原住民委員會委託政大原住民族中心所執行ê計畫,編寫42語幼兒ê教材,教材已經初步編好,這段時間beh試教,來檢驗教材需要做按怎ê修改。

3/27下晡 ùi台中高鐵站駛車去清境,落雨,天氣真寒,我koh感冒。後來聽新聞,合歡山落雪。

3/28早起猶原落雨,今仔日beh訪視去平靜國小,in ê語言是Sediq ê Toda。平靜國校m̄是tī台14甲路上,Google map ê建議是過清境了後一條產業道路。http://goo.gl/maps/UKhu,m̄-koh民宿ê頭家kā阮講,車行袂過,愛翻頭ùi台14線去,往雲龍橋、廬山,接產業道路  http://goo.gl/maps/mOa2。產業道路細條,有時仔會tú著 Tho-la-khu,無好閃車。

另外一个訪視委員mā是ùi花蓮來ê,已經退休ê楊校長。清境國校詹校長mā有來,伊是教材ê編寫者。試教ê曾老師是在地人,支援老師。南投教育處ê賴主任mā有來。以上講ê人,攏是原住民。

訪視結束,下晡tī平靜部落se̍h一下,真媠ê所在。了後駛車轉去清境,歇睏一下了後,暗頭仔去清境農場7-11邊a ê紙箱王食暗頓,koh tī遐附近se̍h一下。

 

3/29落霧社接產業道路去親愛國小,另外一个訪視委員ùi烏來福山來,已經退休ê陳校長,南投縣本土語言輔導團ê陳校長mā有來,koh有親愛國校隔壁ê萬豐國校桂校長mā,佮昨昏有參加ê賴主任。

親愛國校ê校舍 921倒去,重建ê校舍有kā Tayal ê元素khǹg入來,包括望樓、虹橋,教室ê厝頂舖石板,窗仔門下跤mā有石板。

 

較慘ê是我感冒,3/29 早起耳仔怪怪。下晡駛車轉高鐵台中站,佮政大ê助理告別,轉來中教大,koh了點外鐘才順利chhē著耳鼻喉科診所,確定併發中耳炎,未來一禮拜離袂開西藥  :(

M̄-koh對我來講,這是真好ê經驗,熟悉真濟為族語付出ê人。若是最近有時間,我想欲佮in合作,將萬大語、華語對照ê辭典上網。

創作者介紹

台語心世界 Tâi-gú Sim Sè-kài

ungian 發表在 痞客邦 PIXNET 留言(0) 人氣()