台語演講稿 03 我佮大自然有約會

 
各位評審,各位來賓,逐(ta̍k)家好,我是第一號,今仔日我所欲(beh)演講的題目是「我佮大自然有約會」


講著大自然,伊予我ê印象是:神祕、趣味閣好耍。阿爸、阿母定定講我是一個幸福ê囡仔,因為我蹛tī東部,踏(ta̍h)出門,山就擠(tsinn)來我的眼前,行路幾分鐘,太平(ping)洋就tī我的跤邊,欲佮大自然接觸(tshiok),就親像桌頂拈(ni)柑hiah-ni-a輕鬆。自細漢到taⁿ,不管是溪底蹽水、peh山,抑是去山邊ê溝仔底掠魚仔、掠田蛤仔,攏是我生活ê一部份。


Tī我國校六年仔ê時,我ê同窗招我參加自然觀察班,有一工,阮到美崙溪出海口做觀察,行a行,行到溪墘(kînn),老師雄雄叫阮逐家恬恬mài出聲,伊kā吊鏡裁(tshāi)好勢,一開始我sa無tsáng,有樣看樣,戇戇仔攑香tuè拜,斟酌一下看,我看著吳郭魚佮虱目魚不時跳出水面,無閒tshih- tshih;了後,哇,我看著一隻紅喙ê海鳥,雄雄uì天頂衝落來,可憐的魚仔,就按呢予伊拆食落腹;邊a koh有兩隻海徛仔,為著相爭地盤拍甲pìn-piàng叫。看著這幕,我雄雄愣(gāng)去,應該是電視才看會著ê畫面,竟然就活跳跳tī我ê目睭前播送!進前坐車抑是散步經過遮,袂感覺有啥物特別ê所在,想袂到精彩ê故事不時攏tī遮搬演,大自然實在有夠奧妙(ò-biāu)。


Koh有一工暗時,阮去鯉魚山ê山路做生態觀察。我攑手電tī樹林內四界照,忽然間,邊a ê樹洞發出「si~ si~」ê聲音,老師kā我喝(huah):「Mài tín動!」伊用伊ê手電照,我看著一尾青竹絲趖(sô)對我這爿來,tī這個水淹頷、足緊張ê時陣,老師緊kā我捒開,kā蛇掠起來,擲去邊a,我才tháu一口氣,「Hóo!好哩佳哉。」阮繼續行,鹿角龜佮剪liú仔蟲tī樹仔頂塊拍擂台,田蛤仔tī水池仔內咯、咯、咯塊唱歌,飛鼠(tshí)兩蕊紅紅的目睭tī烏暗中塊共阮gîn,暗光鳥u-u叫ê聲音mā真有節奏。M̄-nā是日時,暗暝的大自然猶原是鬧熱滾滾,予我想著伍佰的一塊歌:「五種氣味ioh~,大自然a我愛你」我對心內喝(huah)出來:「鯉魚潭a鯉魚潭,明年仝這個時陣,我一定會koh再來。」


佮大自然約會,m̄-nā會當佮遮ê動物、植物接觸(tshiok),感受大自然ê奇巧(kî-khá)佮奧妙(ò-biāu),koh thang行路運動,予身體勇健,真正是一兼二顧,摸蜊仔兼洗褲。向(ǹg)望美麗的大自然袂因為人類的過度開發受著破壞(phò-huāi) ,予咱永永遠遠會當佮大自然約會。


我ê演講到遮結束,感謝逐家。

arrow
arrow
    全站熱搜

    ungian 發表在 痞客邦 留言(0) 人氣()