台語演講稿 01 欲按怎幫助別人


幫助別人m̄免等,有心肯(khíng)做無困難;你咱同齊幫贊人,社會溫暖有向望。


各位評審,各位來賓,逐(ta̍k)家好,我是第一號,今仔日我欲演講的題目是「欲按怎幫助別人」。


我感覺幫助別人,就親像幫助家己仝款,幫助別人,家己mā會感覺真快樂。紲(suà)落來,我欲來分享兩個故事。


第一個故事發生佇我身邊,佇我國校五年的時,阮班有一個同學,伊叫做阿良,一出世著有Asperger症,這是一種自閉症,雖然語言能力正常,mā bē比人較戇,m̄-koh個性較孤癖,跤手較慢鈍,佮人tsih接抑是溝(koo)通會有一寡困難;m̄-nā按呢,伊閣有一種怪癖,有時仔上課上到一半,會剝(pak)家己的跤皮來食,予人看著強欲吐。因為按呢,真濟同學攏kā伊排斥,甚至會kā伊欺負。


老師開真濟時間kā全班說明阿良的狀況(tsōng-hóng),請逐家愛佮伊做朋友。M̄-koh逐家猶是驚驚,m̄敢佮伊做伙。畢業旅行的時,老師為著同學分組的代誌,煩惱甲憂頭結面,我kā老師講我願意佮伊仝一組,老師真歡喜講:「好!」


旅行的彼幾工,阮佮阿良行鬥陣,食,仝桌;睏,仝間,tī房間內相偃(ián),用枕頭相khian,阮幾個褲頭結相黏(liâm),阿良的笑容漸漸浮出來a,看著伊彼幾工滿面春風笑瞇瞇,阮mā喙笑目笑真歡喜。這件代誌予我知影,替別人想就是幫助別人。


另外一個故事,發生佇台東,一個叫做陳樹菊的阿媽,伊出世佇散赤的家庭,因為厝內無錢納(la̍p)醫藥費,老母suah來難產過身,有一個小弟mā破病死去。總是,一枝草一點露,天公無絕人的路,伊國校畢業了後就佇菜市仔賣菜,發願欲幫贊別人,所以平常時儉腸neh肚,一點一滴kā所趁來的艱苦錢粒積起來,才koh捐予有需要的團體。伊的故事予媒體報導了後,受著社會的肯(khíng)定,甚至予美國《時代雜誌》定(tīng)做今年上有影響力(la̍t)的人物,成做台灣人的光榮。這馬,就算名聲已經透世界,伊照常賣菜,繼續欲幫助人。伊的故事kā咱講,有心行,m̄驚路頭遠。


Koh親像舊年咱台灣發生八八水災,造成一寡性命佮財產的損失。真濟人發揮愛心,有人捐錢,有人去災區做義工,koh有人做網站來傳送消息,我mā提出我的私傢錢買文具,送予災區的小朋友。阮囡仔人用私傢錢mā會使幫助人。


俗語話講,做好代,較贏食早齋。幫助別人無啥物撇步,有心欲做,做落去就著a。我的演講到遮結束,感謝逐(ta̍k)家。

arrow
arrow
    全站熱搜

    ungian 發表在 痞客邦 留言(0) 人氣()