台語心世界 Tâi-gú Sim Sè-kài

台語信望愛台語輸入法專案募款說明

台語信夢愛長期關心台語文運動，向望台語有閣再興ê一工。阮毋但定期提供好看有營養ê台語文章予讀者佇線頂欣賞，嘛發展 佮整理真濟台語文用ê家私方便社會大眾來利用。毋過佇台語輸入法ê這部分，一直無真正好用ê家私會當予社會大眾輕鬆ê拍出台語ê文字。雖罔佇輸入漢羅這方面本站有推捒出KKS，YKS等等ê台語漢羅輸入法，佇全羅輸入方面嘛有教育部ê「台灣閩南語羅馬字輸入法」抑是拋荒工作室ê 「Taiwanese Package」 通用。毋過遮ê輸入法攏有怹欠點ê所在。有ê歹安裝，有ê輸入齒ê長度傷限制，有ê無支援 Windows Vista。益閣有佇漢字ê用字方面嘛真無一致。咱會使講，一ê好安裝，簡單用，拍--出來ê字媠氣閣正確ê台語羅馬字／漢字輸入法，的確是關心台語ê人佇現此時真需要，毋過猶無存在ê家私。

為著欲予社會大眾會使佇電腦頂面輕鬆如意ê拍出媠氣閣正確台語羅馬字佮台語漢字，台語信夢愛這馬欲來成立一个台語輸入法專案，向望會使募一筆錢，用來委託專業个軟體公司開發台語輸入法佮安裝程式，免費放送予社會大眾來利用。輸入法是真專業ê軟體，毋是一般人有才調開發--ê。透過關係，台語信夢愛佮佇輸入法這方面是不止仔專業个石磐軟體公司有初步个接觸。石磐軟體公司願意用十五萬个價數，來開發予Windows XP kap Vista用ê台語輸入法。

佇輸入法ê本體以外，嘛會開發一個簡單免費氣ê安裝程式，簡化逐家安裝台語輸入法个手續。這個安裝程式毋但會自動替你鬥台語輸入法本體，嘛會佮替你鬥一寡台語漢字佮羅馬字个字型。佇漢字用字這方面，台語信望愛ê工作人員嘛已經開始校對現此時ê詞庫內ê用字。基本上會參考教育部ê推薦用字佮教育部線頂ê「台灣閩南語常用詞辭典」ê用字。向望佇輸入法正式開始放送ê時，配合ê是校訂完成ê詞庫。

這個計畫按算攏總欲募十五萬，分兩階段來完成。第一階段ê目標是七萬箍。募著七萬箍ê時，石盤軟體公司就會開始開發輸入法佮安裝程式，而且會開始開始放送粗胚ê軟體(alpha version)予第一階段有寄付ê寄附者優先來試用。募夠額十五萬ê時，石盤軟體公司著會開始收尾，完成輸入法。會按順序放送幼胚ê軟體(beta version)佮半成品(release candidate)等等試用版ê軟體予逐家來試用。按算佇進入第二階段兩個月以內完成正式版ê台語輸入法佮安裝程式，正式推捒予社會大眾來利用。

各位關心台語文ê朋友，你若是有認同這ê專案ê理念佮做法，向望你寄附入來台語輸入法專案ê口座。愈濟人來寄附，這ê專案著愈早會使來開始佮完成，咱著早一工有好用ê台語輸入法通用。

寄附ê方法請參考『xx』這ê文件。

下跤簡單說明輸入法本體拍算欲支援ê功能，予逐家參考：

輸入法本體ê功能ê說明：

支援平台：

Windows XP SP2 以上、Windows Vista

全羅輸入：

會使拍羅馬字（台羅佮白話字）。佮教育部ê台灣羅馬字輸入法有差不多ê功能。

漢字輸入：

基本功能：用羅馬字（台羅抑是白話字）作齒（key）輸入台語漢字。會使拍單字（愛拍數字調號），嘛會使直接拍詞（免拍數字調號）。

漢字用字主要參考教育部公布ê建議用字佮教育部ê線頂台灣閩南語辭典。

例：

拍： lan2 

出現：

1 咱

2 嬾

3 懶

4 攤

5 赧

予你選。

拍： kongsi

出現：

1 公司

2 攻勢

2 公示

予你選。

進階功能：羅漢模式（主要輸入羅馬字毋過嘛會使輸入漢字）佮漢羅模式（主要輸入漢字毋過嘛會使輸入羅馬字）。

羅漢模式（並列、漢字優先模式）

拍： kongsi

出現：

1 公司(kong-si)

2 攻勢(kong-si3)

2 公示(kong-si7)

予你選。用 1 選「公司」用 shift-1 選「kong-si」。

漢羅模式（並列、羅馬字優先模式）

拍： kongsi

出現：

1 kong-si(公司)

2 kong-si3(攻勢)

2 kong-si7(公示)

予你選。用 1 選「kong-si」用 shift-1 選「公司」。

附註：

1. 同時支援四種輸入模式：台羅、POJ。羅馬字輸出可選擇台羅、POJ、POJ相容（不組合nn等）
2. 輸入法會有一個狀態列顯示現在是在「全羅／全漢／漢字優先模式／羅馬字優先模式」mode

預計需要製作時間：本體約一個月