自由時報自由廣場  2006/5/5
Tī(在)英國,最近有一個判決引起bōe少(不少)討論,【Ta-bín-sì (Da Vinci /達文西)密碼】這本書ê作者Tián-bu-láng (Dan Brown) hō͘ (被)另外一本書【聖血kap(與)聖杯】ê作者告,講書ê主題是ùi(從) in(他們) hiâ(那邊)抄來ê,侵犯著著作權。
經過審理,法官Su-mí-sù (Smith)判Tián-bu-láng無罪,m̄-koh (不過),tī 71 phè-chì (Page) ê判決書,法官有樣看樣,利用斜體字kā(把)密碼藏tī內底。一個律師發現著,經過法官用電子郵便kā伊點破,三禮拜後,律師運用Hūi-pō-ná-chhì (Fibonacci /費氏)數列kā密碼tháu開(解開)。
判決書全文會tàng(可以) tiàm(在)英國高等法院網站查著,雖罔(雖然)有藏密,並無失去權威性。法官製造出國際新聞,本身超然中立ê地位mā原在。
台語文若thang(可以)發展做親像音素文字ê羅馬字,無的確咱mā有機會享受這款趣味。M̄-koh,咱ê檢察官,會設網站公開批評現任總統「強姦司法」,會上街頭影響立委執行檢察總長任命案投票,口口聲聲講beh(要)維護司法正義kah(和)尊嚴,soah(卻) bōe記(忘記)家己ê身份,按呢(這樣) ê檢察官,台灣民眾kám(難道)會kā信táu (在乎)?

 Da Vinci Code

Chū-iû-sî-pò chū-iû kóng-tiûⁿ  2006/5/5
   Tī Eng-kok, chòe-kūn ū chi̍t-ê phòaⁿ-koat ín-khí bōe-chió thó-lūn, "Ta-bín-sì bi̍t-bé" chit-pún chu ê chok-chiá Tián-bu-láng hō͘ lēng-gōa chi̍t-pún chu "Sèng-huih kah Sèng-poe" ê chok-chiá kò, kóng chu ê chú-tôe sī ùi in hiâ chhau--lâi ê, chhim-hōan tio̍h tù-chok-kôan.
   Keng-kòe sím-lí, hoat-koaⁿ Su-mí-sù phòaⁿ Tián-bu-láng bô-chōe,m̄-koh, tī 71 phè-chì ê phòaⁿ-koat-su, hoat-koaⁿ ū Iūⁿ khòaⁿ iūⁿ, lī-iōng siâ-thé-jī kā bi̍t-bé chhàng tī lāi-tóe. Chi̍t-ê lu̍t-su hoat-hiān tio̍h, keng-kè hoat-koaⁿ ēng tiān-chú-iû-piān kā i tiám-phòa, saⁿ-lé-pài āu, lu̍t-su ūn-iōng Hūi-pō-ná-chhì sò͘-lia̍t kā bi̍t-bé tháu--khui.
   Phòaⁿ-koat-su chôan-bûn ē-tàng tiàm Eng-kok ko-téng hoat-īⁿ bāng-chām chhâ--tio̍h, sui-bóng ū chhàng bi̍t-bé, pēng bô sit-khì kôan-ui-sèng. Hoat-koaⁿ chè-chō chhut kok-chè sin-bûn, pún-sin chhiau-jiân tiong-li̍p ê tōe-ūi mā gôan-chāi.
   Tâi-gú-bûn nā thang hoat-tián chòe chhin-chhiūⁿ im-sò͘ bûn-jī ê Lô-má-jī, bô tek-khak lán mā ū ki-hōe hióng-siū chit-khóan chhù-bī. M̄-koh, lán ê kiám-chhat-koaⁿ, ē siat bāng-chām kong-khai phoe-phêng hiān-jīm chóng-thóng "kiông-kan su-hoat", ē chiūⁿ koe-thâu éng-hióng li̍p-úi chip-hêng kiám-chhat chóng-tiúⁿ jīm-bēng-àn tâu-phiò, kháu-kháu siaⁿ-siaⁿ kóng beh ûi-hō͘ su-hoat chèng-gī kah chun-giâm, soah bōe-kì ka-kī ê sin-hūn, an-ne ê kiám-chhat-koaⁿ, Tâi-ôan bîn-chiòng kám ē kā in sìn táu?

ungian 發表在 痞客邦 PIXNET 留言(0) 人氣()